حوار بين فنجال وبياله

حوار بين فنجال وبياله

دار الحديث التالي بين الاثنين

البياله // يحق لك يالفنجال كلن يحبك ويحترمك
الفنجال // الرازق في السما والحاسد في الأرض
البياله // مهوب حسد بس عتب <== مقهوره
الفنجال // والله محدن قال لك تصيرين بياله
البياله // وش السوات كلنا طلعنا من بطن وحده قصدي مصنع واحد بس الشكوى لله ما باليد حيله
الفنجال // هالحين وش تبين ؟
البياله // ودي تكلم راعي البيت والضيوف يعطوني وجه
الفنجال // أنا وش دخلني هم أحرار تبين تورطيني
البياله // نعنبو الصداقة وين كلامك من أول يوم تقول حنا إخوان وحبايب وإلا هك في هك
الفنجال // هذاك أول...وأول تحول .
البياله // إيه يحق لك حتى أنت يحطون معك قدوع وأنا لا وأحيانا إذا التفتوا لي يحطون معي نعناع وأحيانا بدون سكر بعد
الفنجال // القدوع للرجال مهوب مثلك يالزلابه
البياله // طيب ممكن نتبادل الأماكن ولول يوم
الفنجال // معصي وانأ الفنجال ما بقى إلا أصير بياله
البياله // طيب وش أسوي بعمري ؟؟
الفنجال // كلن يتعلق بعرقوبه يالرخمه
انتي ما سمعتي وش يقول بن حثلين

ياما حلى الفنجال مع سيحة البال *** في مجلس ما فيه نفس ثقيل
هذا ولد عم وهذا ولد خال *** وهذا رفيق ما ندور بديله

وكلمه منه وكلمه منها وفجأه طرررربااااق
صوت البيالات والفناجيل يتكسرن يوم مر بزر وشات الطوفريه وهو ما شافها
<=== الفنجال راسه فوق ورجليه تحت
<=== البياله مالت خشتها من الشوته

وتبقى حكاية البياله والفنجال على مر الزمن لا احد يقدر أن يفصل بينهما